Ўзбекистонда Бутунжаҳон гўзаллик конгресси филиали очилди

2018 йилнинг февралида Ўзбекистонда World Beauty Congress (WBC) — Бутунжаҳон гўзаллик конгресси филиали расман очилди, дея хабар бермоқда «Nuz.uz».

16—26 март кунлари Ҳиндистонда WBC кўмагида ўтказиладиган Miss Supermodel Worldwide 2018 халқаро анъанавий танлови бўлиб ўтди. Унда Осиё, Африка, Европа, Лотин Америкаси ва Шимолий Американинг 70 га яқин мамлакати вакиллари иштирок этди. Танловда Ўзбекистон номидан П.Ф.Боровский номидаги Тошкент тиббиёт коллежининг 2-курс ўқувчиси, 18 ёшли Зарина Андиржанова қатнашиб, иккинчи вице-мисс номини қўлга киритди.

Тошкентда 30 март куни бўлиб ўтган матбуот анжуманида Зарина ўз таассуротлари билан ўртоқлашди, шунингдек, Тошкентдаги Бутунжаҳон гўзаллик конгресси филиали тақдимоти бўлиб ўтди. Филиал миллий директори Дмитрий Кан аниқлик киритишича, Бутунжаҳон гўзаллик конгресси — бу 2005 йилда ташкил этилган халқаро жамоатчилик ташкилоти. Унга аъзо бўлган 70 дан ортиқ мамлакатлардан бирида ўтказиладиган анъанавий танловда ҳар бир минтақа бўйича ва турли йўналишлар бўйича гўзаллик қироличалари танлаб олинади.

Ўз аҳамиятига кўра, WBC «Дунё гўзали» (Miss World) ва «Коинот гўзали» (Miss Universe)дан кейинги учинчи танловдир.