Бухоро вилоятининг турли ҳудудларида фуқароларнинг қорамоллари ва қўй-қўзиларини Malibu автомобилида ўғирлаш билан шуғулланиб келган гуруҳ фош этилди. Бу ҳақда Бухоро вилояти ИИБ матбуот хизмати хабар бермоқда.
ИИБга бир кунда қорамол ва қўй ўғирланиши билан боғлиқ иккита ариза келиб тушган — ромитанлик фуқаро 5 миллион сўмлик сигири ўғирлаб кетилганидан шикоят қилган бўлса, Шофирконнинг Читгарон қишлоғида яшовчи фуқаро молхонасидан 400 минг сўмли қўй ўғирланганини маълум қилган.
Бухоро вилояти ИИБдан маълум қилишларича, «олиб борилган тезкор-суриштирув ишлари давомида ушбу жиноятлар кимлар томонидан содир этилгани аниқланган, шу орқали вилоятнинг турли ҳудудларида содир этилган ва очилмай қолган мол ўғриликлари фош этилган».
Маълум бўлишича, шу вақтгача турли жиноятлари учун 9 марта судланган 58 ёшли вобкентлик фуқаро куёви — 30 ёшли бошқа бир вобкентлик (у ҳам муқаддам судланган) билан тил бириктириб, Бухоро вилоятининг турли ҳудудларида яшовчи фуқароларнинг қорамол ва қўй-қўзиларини ўғирлаш билан шуғулланган.
«Қайнота-куёв қинғир ҳаракатларидан ҳеч ким шубҳаланмаслиги учун қўлга киритилган қўй-қўзиларни, ҳаттоки йирик қорамолларни ҳам қайнотага тегишли Malibu’да ташиб келган», — дейилади ИИБ ахборотида.
Қайнотанинг хонадони ва ёрдамчи хўжаликлари кўздан кечирилганда молхонасида турли ҳудудлардан ўғирлаб келинган қўй-қўзилар ва қорамоллар, бундан ташқари, турли эҳтиёт қисмлар ва ёқилғи маҳсулотлари борлиги аниқланган.
Ҳозирги вақтда мазкур ҳолатлар юзасидан қайнота ва куёвга нисбатан Жиноят Кодексининг 169-моддаси 2-қисми «в», «г» бандлари билан жиноят иши қўзғатилган, тергов олиб борилмоқда.
Изоҳ (0)