Жорий йилнинг 14 июнь куни Россияда футбол бўйича Жаҳон чемпионати баҳсларига старт берилади. Аввалроқ ФИФА мундиалда ишлайдиган ҳакамлар рўйхатини эълон қилганди. Рўйхатда ўзбекистонлик Равшан Эрматов ва унинг ёрдамчилари Абдуҳамидулло Расулов ва Жаҳонгир Саидов борлиги ҳақида аввал хабар бериб ўтилган эди.
Ўзбекистон футбол ассоциацияси Халқаро бошқармаси бошлиғи ўринбосари сифатида фаолият юритаётган Олим Арифов ЖЧ-2018 мусобақасига комиссар сифатида расман таклиф қилинган.
Шу вақтга қадар нафақат Ўзбекистондан, балки Марказий Осиёдан бирорта мутахассис ЖЧда комиссар сифатида ишламаган. Олим Арифов бу борада биринчи бўлади.
«Албатта, ФИФА томонидан келган таклифдан жуда хурсандман. Бу жуда катта ишонч ва шу билан бирга катта масъулият ҳам. Ўз ўрнида юртимизда футболга ҳукумат даражасида эътибор қаратилаётгани таъкидлаган ҳолда, Ўзбекистон футбол ассоциацияси раҳабарияти томонидан футболни янги босқичга олиб чиқиш борасида амалга оширилаётган ислоҳотларни алоҳида қайд этиш керак. Бу ислоҳотлар натижасида биз каби мутахассисларга янгидан-янги имкониятлар яратилмоқла. Биз бу имкониятлардан унумли фойдаланган ҳолда, билдирилган ишончни оқлаш учун қўлимиздан келганча ҳаракат қилишга ваъда берамиз», — дейди Олим Арифов.
Изоҳ (0)