Фирибгарлар Telegram’нинг ишламай қолганида фойдаланиб, 59 минг долларни қўлга киритди

Номаълум шахслар Павел Дуров номидан Telegram мессенжерининг ишида юзага келган узилиш сабаб Twitter’да криптовалюта ютиб олиш мумкин бўлган «кечирим» акциясини ўтказди. Фирибгарлар бу орқали салкам 59 минг долларни қўлга киритган, деб хабар берди «VC.ru».

Акция борасидаги хабарлар Telegram асосчисининг Twitter’даги профилига ўхшаш сохта аккаунтлардан тарқатилган. Хабарларнинг худди шу қисмида фойдаланувчиларга иштирок учун миннатдорчилик ҳам билдирилган.

Фирибгарлар тақдим этган ҳавола 26 март куни рўйхатдан ўтказилган сайтга элтади. Фойдаланувчиларга кўрсатилган манзилдаги шифрланган QR-кодга 0,5 дан 5 гача эфир жўнатиш ва бу орқали 5 дан 100 гача эфир ютиб олиш таклиф этилади.

Сайтда умумий миқдорда бешта «ҳамён» кўрсатилган. У ерда 59 минг доллар (тахминан 148 та эфир) сақланмоқда.

Twitter ҳозирча фирибгарларнинг сохта аккаунтини блокламаган.

Эслатиб ўтамиз, 29 март куни Telegram мессенжери уч соат давомида Европа, Яқин Шарқ ва МДҲ давлатларида, хусусан, Ўзбекистонда ҳам ишламай қолди.