Андижон шаҳрининг эски шаҳар ҳудудида «Жоме» меъморий мажмуаси фойдаланишга топширилди, дея хабар бермоқда ЎзА.
Андижоннинг эски шаҳар ҳудуди кейинги йилларда янгича қиёфа касб этмоқда: Мустақиллик кўчаси барпо этилди, «Эски шаҳар деҳқон бозори» замонавий кўринишда қайтадан қурилди. Ҳудудда кенг кўламли қурилиш-ободонлаштириш ишлари давом эттирилмоқда.
Андижон тарихининг кўзгуси ҳисобланган «Жоме» меъморий мажмуаси юртдошларимиз ва хориждан ташриф буюрадиган сайёҳлар учун зиёрат қиладиган гавжум масканлардан бирига айланади, дейилади хабарда.
Шунингдек, Андижон вилояти тарихи ва маданияти давлат музейи реконструкция қилинди, вилоят амалий санъат ва бадиий ҳунармандчилик маркази ташкил этилиб, миллий кўринишдаги сувенирлар, совғалар сотиладиган 50 дан ортиқ дўкон қад ростлади. Мажмуадан Маданий мерос объектларини муҳофаза қилиш ва улардан фойдаланиш илмий ишлаб чиқариш бош бошқармасининг Андижон вилояти бўйича давлат инспекцияси учун ҳам бино ажратилди.
«Жоме» меъморий мажмуасининг қурилиши учун 10 миллиард сўмдан зиёд маблағ сарфланди.
Изоҳ (0)