Наманган вилоятининг Янгиқўрғон туманидаги «Бўстон» маҳалласида бир қатор янги объектларнинг очилиш маросими бўлиб ўтди. Бу ҳақда туман ҳокимлиги ахборот хизмати маълум қилди.
Ўзбекистон Президенти ўтган йил вилоятга ташрифи давомида мазкур маҳаллада тўхтаб ўтгани ҳудудда катта ўзгаришларни бошлаб берди. Қисқа вақт мобайнида маҳалла фуқаролар йиғинининг янги биноси, тикувчилик корхонаси, спорт мажмуаси, дорихона, китоб, озиқ-овқат ва трикотаж маҳсулотлари дўконлари, ўқув маркази ва оталар чойхонасини ўз ичига олган маҳалла гузари ҳамда 10 та оилага мўлжалланган намунали уйлар фойдаланишга топширилди.
— Давлат раҳбари бўлган эски идора билан янги бинони таққосласангиз ер билан осмончалик фарқни кўрасиз. Ҳозирги 7 та хонада раис, маслаҳатчи, профилактика инспектори учун кабинетлар, мажлислар зали, кутубхонамиз бор. 3 мингдан ортиқ аҳоли истиқомат қиладиган маҳалламизда кейинги икки йил мобайнида бирор жиноятчилик ёки ҳуқуқбузарлик содир этилмади. Ўзим ва профилактика инспекторимиз Шерали Маҳмудов республика танловида иштирок этиш ҳуқуқини қўлга киритдик, — дейди маҳалла фуқаролар йиғини раиси Абдуфаттоҳ Саидов.
Маҳалла идорасининг янги биноси қурилишига 750 миллион сўм сарфланди. Республика «Маҳалла» хайрия жамоат фонди томонидан 167 миллион сўмлик идора жиҳозлари, оргтехника воситалари топширилди.
Лойиҳа қиймати 1 миллиард 700 миллион сўм бўлган спорт мажмуаси мини стадион, волейбол, баскетбол, гандбол, бокс сингари кўплаб спорт турлари бўйича шуғулланишга мўлжалланган ёпиқ иншоотдан иборат. Мажмуада кунига 300 нафар ўғил-қиз машғулот олиб бориши учун барча шароит мавжуд.
«Бўстон» трикотаж корхонасида 120 та янги иш ўрни яратилди. Кенг ва ёруғ цехда асосан коллеж битирувчилари бўлган ёшлар меҳнат қилмоқда. Бу ерда тайёрланаётган маҳсулотлар эса ҳозирдан ўз харидорларига эга.
Маҳаллада қад ростлаган 10 та намунали уй ногиронлиги бўлган шахслар ва кам таъминланган оилаларга топширилди. Уларнинг ҳар бирига уй калитидан ташқари замонавий телевизорлар ҳам тақдим этилди.
Тадбирда Президентнинг Давлат маслаҳатчиси Рустам Комилов, Фуқароларнинг ўзини ўзи бошқариш органлари фаолиятини мувофиқлаштириш республика кенгаши бошқаруви раиси Шавкат Жавлонов, вилоят ҳокими Хайрулло Бозоров иштирок этди.
Янги объектлар фойдаланишга топширилиши муносабати билан маҳаллада ўтказилган маросим ҳақиқий байрам кўринишини олди.
Дастурхон ёзилиб, ош тортилди, сумалак ва бошқа баҳор таомлари тайёрланди. Санъаткорлар, дорбозлар чиқишлари даврага файз киритди.
Изоҳ (0)