2030 йилга келиб, АҚШ, Россия, Франция, Ҳиндистон ва Хитой дунёдаги энг кучли қуруқликдаги армияларга эга бўлади. Бу ҳақда ҳарбий эксперт Роберт Фарли The National Interest учун ёзган мақоласида маълум қилди, деб ёзади Tengrinews.
Америка армияси 12 йилдан кейин жаҳон «олтин стандарти» бўлиб қолади, деб ҳисоблайди Фарли. Совуқ уруш тугаганидан буён Пентагон, шу жумладан, Ироқ ва Афғонистонда жанговар операциялар бўйича аҳамиятли тажриба тўплади. Шу билан бирга, америкаликлар йирик ҳарбий бюджетга ва дунёдаги энг катта учувчисиз учар қурилмалар паркига эга.
Россия қуролли кучлари, ўз навбатида, СССР тарқалгач, оғир даврни бошдан кечирди, дейилади мақолада. Аммо керакли даражада молиялаштирилиши туфайли Россия армияси қайта тикланган ва энди сони ва малакаси билан қўшниларини қўрқитмоқда, деб ёзади Фарли.
Мақолада қайд этилишича, Европа мамлакатларидан Франциягина қудратли қуролли кучларини сақлаб қолади. Ҳиндистон рақобатчиларидан ҳарбий технологиялар борасида ортда қолмоқда, аммо уларни АҚШ, Россия ва Европадан сотиб олишдан пул аямайди.
Хитой қуруқлик армиясига реал жанговар ҳаракатлар тажрибаси етишмайди, аммо Пекин «деярли чекланмаган жонли куч»дан фойдаланиш имкониятига эга, дейилади мақолада.
Изоҳ (0)