Ўзбекистон аҳолисининг турмуш даражасини ошириш ҳамда яшаш учун қулай шарт-шароитлар яратишга қаратилган ҳукумат қарорлари ижросини таъминлаш мақсадида молия вазирлиги томонидан Франциянинг Veolia компанияси билан Ўзбекистонда коммунал хизматларни ривожлантиришга қаратилган лойиҳаларни амалга ошириш бўйича бир қатор учрашув ва муҳокамалар амалга оширилди. Бу ҳақда молия вазирлиги матбуот хизмати «Дарё»га хабар берди.
Икки томонлама ўтказилган учрашувлар ҳамда ҳудудларда кўрсатилаётган коммунал хизматларнинг сифатини ўрганиш бўйича ўтказилган ўрганишлар натижасида Франциянинг Veolia компанияси ҳамда Ўзбекистон ҳукумати ўртасида «Наманган шаҳрининг иссиқлик таъминотини ривожлантириш» ҳамда «Тошкент шаҳрининг ичимлик суви таъминотини яхшилаш» лойиҳаларини амалга ошириш бўйича келишув меморандуми имзоланди.
Ушбу лойиҳаларнинг амалга оширилиши натижасида истеъмолчиларга ичимлик суви ҳамда иссиқлик энергиясини етказиб беришдаги йўқотишларнинг ҳамда атроф муҳитга ўзининг салбий таъсирини кўрсатувчи омилларнинг камайишига ҳамда аҳолига кўрсатилаётган коммунал хизматларнинг сезиларли даражада яхшиланишига олиб келади.
«Келажакда бу каби лойиҳаларни мамалакатнинг бошқа шаҳар ва туманларида, шу жумладан, олис ҳудудларида ҳам амалга ошириш кўзда тутилмоқда», — дейилади хабарда.
Изоҳ (0)