Украинанинг Запорожье шаҳридаги саноат зонасида дори-дармон чиқиндилари топилди. Бинтлар, ампула ва таҳлил намуналаридан иборат биоматериаллар бир неча ой ташландиқ омборларда сақланган, деб хабар берди «TSN.ua».
Қўланса ҳид ҳатто совуқ ҳароратда ҳам атрофга тарқалиб, яқин ўртада ишлайдиган одамларни бу ерга келишга ва омборни очишга мажбур қилган. Улар қўриқланмайдиган ушбу бинода тиббиёт анжомлари ва одамларнинг қолдиқларига дуч келган. «Қўлларни, оёқларни кўрдик — бу ҳали пакетлардан тушиб қолгани. Атрофда итлар, мушуклар югуриб юрибди, кўринишидан улар майдалаб ташланган», — дейди гувоҳлардан бири.
Воқеа жойига тезкор қидирув гуруҳи чақирилган. Ҳуқуқ-тартибот ходимларининг аниқлашича, мазкур ҳудуд Днепр ва Запорожьедаги тиббий муассасаларидан чиқиндиларни олиб чиқиб кетиш билан шуғулланувчи фирмага тегишли бўлган. Маълумотларга кўра, омборда 4 тоннага яқин чиқинди сақланган. «Топилмалар»нинг 1,5 тоннаси биологик чиқинди бўлиб, улар ўпка силини даволашга ихтисослашган муассасалардан олиб келинган. Қолган 2,5 тоннаси эса тиббиёт асбоб-ускуналари бўлиб, улар орасида симоб ва оғир металлар мавжуд.
Компаниянинг маълум қилишича, суд Янги йил арафасида мазкур мулкка хатлов чиқарган. Бунинг натижасида чиқиндилар 2,5 ой омборда ётган.
Ҳозирда суд ўз қарорини бекор қилган ва чиқиндилар йўқ қилина бошланди. Март ойининг охирига қадар омбор тўлиқ тозаланади.
Изоҳ (0)