Наманган шаҳрида Наврўз сайли 5 тонналик сумалакни тарқатиш билан бошланди. Бу ҳақда «Дарё» мухбири Азизбек Абдувалиев хабар бермоқда.
Сумалакнинг учдан бир қисми вилоятдаги меҳрибонлик, саховат уйлари, шифохоналар ва кам таъминланган оилаларга етказилди. Шунингдек, сайлга келган наманганликлар, вилоят меҳмонлари ҳам баҳор таомидан баҳраманд бўлди. Уларга 15 мингдан ортиқ бир марталик идишларда сумалак тарқатилди.
Наманган шаҳридаги Бобур номли маданият ва истироҳат боғи ҳар қачонгидан кўп зиёратчи билан тўлди. Қозон атрофидаги муҳит дунёнинг энг катта туризм тадбирларини ҳам ортда қолдирди. Японлар, турклар, корейслар, немислар, руслар ва бошқа миллат вакиллари байрам шукуҳини наманганликлар билан бирга баҳам кўрди.
Айрим хориж ОАВларида «Наманганда ‘мегасумалак’ учун аҳолидан ўлпон йиғилди» қабилида хабарлар берилди. Қайд этиш жоизки, тадбир ташкилий қўмитаси «бу эҳсон сумалаги, биз ҳам қўшилайлик, ун ёки ёғ олиб берайлик» деган таклифларни рад этди ва «ҳаммаси етарли, бунга ҳеч қандай эҳтиёж йўқ» дея жавоб берди.
Маълумот учун, тайёргарлик жараёнида 1,1 тонна буғдой тозаланди ва ювилди, 2,5 тонна ун элакдан ўтказилди. Бу жараёнда 300 нафардан зиёд хотин-қиз иштирок этди.
Ювилган буғдой махсус тайёрланган ва умумий юзаси 112 квадрат метрдан кўпроқ бўлган 50 хонтахтага ундиргани қўйилди. Сумалак пиширишга жалб этилган 25 нафар аёлнинг тун-у кун навбатчилиги ташкил қилинди. Майсани парваришлаш жараёнида отинойилар томонидан хатми Қуръон ўқилди, юртга тинчлик-осойишталик, деҳқончиликка барака, эзгу ишларга ривож тиланди.
Қиймалагичдан чиқарилган 5,2 минг литр буғдой шираси катта қозон атрофига жойлаштирилган 27 дошқозонга жо бўлди. 250 литр ўсимлик мойи ва 2,4 минг литр сув ишлатилган, дарёдан махсус териб келиб, ювиб-қайнатиб тозаланган тош солинган сумалак 24 соат қайнади.
21 март – Наврўз тонгида қозон ўрамаси очилди ва барча кутган сумалак меҳмон ва мезбонларга тортиқ қилинди.
Шунингдек, сайл давомида бўлиб ўтган «Дўппидай ош» кўрик-танловида моҳир пазандалар энг кам миқдор — 250 грамм гуруч дамлаш бўйича баҳсга киришди. «Тандир шоу» беллашувида тандирда пишириладиган таомлар тайёрлаш маҳорати синовдан ўтказилди.
Санъаткорлар, цирк жамоалари, ёзувчи ва шоирларнинг чиқишлари байрам кайфияти кўтаринки бўлишини таъминлади.
Изоҳ (0)