Бухоро — Мискин темир йўл линиясида йўловчи поездлар ҳаракати бошланди

Тошкент — Ургенч ва Тошкент —Нукус — Қўнғирот йўналишидаги йўловчи поездлар 20 мартдан бошлаб янги қурилган Бухоро — Мискин темир йўл линияси орқали ҳаракатланишни бошлади. Бу ҳақда «Халқ сўзи» хабар берди.

Ҳозирги кунга қадар Тошкент — Ургенч поезди 1027, Тошкент—Нукус—Қўнғирот поезди 1327 километр йўл босиб Навоий — Учқудуқ — Мискин магистрали орқали ҳаракатланган бўлса, ушбу лойиҳанинг қуриб битказилиши билан поездлар қатнови қарийиб 100 километрга қисқарди. Бу йўл учун кетадиган вақтни, ёнилғини ва бошқа харажатларни тежашга замин яратади.

Тошкент шаҳридан Урганч, Хива, Нукус шаҳарларига борадиган ҳамда мазкур шаҳарлардан Тошкент шаҳрига келадиган йўловчи поездларининг ҳаракатланиш вақти салкам 2 соатга қисқарди.

Тошкент — Саратов, Тошкент — Волгоград, Алмати — Нукус, Андижон — Ургенч, Нукус — Ургенч — Термез поездларининг ҳам ушбу янги линия орқали қатнови йўлга қўйилади.

Мазкур темир йўлнинг иккинчи босқичида электрлаштириш ишлари амалга оширилиб, бу йўналиш орқали электропоездлар ҳамда юқори тезликда ҳаракатланувчи Аfrosiyob замонавий поездлари қатновини ҳам амалга оширилиши кўзда тутилган.