Самарқанд вилояти ҳокими Туробжон Жўраев вилоятнинг Каттақўрғон туманидаги 42-мактаб ўқитувчиси Диана Еникееванинг ўлими билан тугаган бахтсиз ҳодисага муносабат билдирди, дея хабар бермоқда «Kun.uz».
Бир боланинг онаси ҳисобланган Диана Еникеева 14 март куни Каттақўрғон туманидаги кўча тозалаш ишларига жалб этилган. Шу куни, Еникеева йўл ўртасидаги тўсиқларни оқлаётганида, уни КАМАЗ юк машинаси уриб кетган. Ҳодиса оқибатида 23 ёшли муаллима вафот этган.
Самарқанд вилояти ҳокими Туробжон Жўраев юз берган ҳодиса юзасидан марҳуманинг вафоти муносабати билан ҳамдардлик билдириб, шу вақтгача «ижтимоий соҳа ходимлари маҳаллий ҳокимлик органлари ва бошқармалар томонидан ҳудудларни ободлаштириш ишларига чиқарилмагани»ни таъкидлаган; ўқитувчилар — айнан ижтимоий соҳа ходимларидир.
Самарқанд вилоят ҳокимлиги ва шахсан ўз номимдан Каттақўрғон туманида йўл-транспорт ҳодисаси натижасида ҳалок бўлган Диана Еникееванинг фожиали ўлими туфайли чуқур ҳамдардлик изҳор этишга ижозат бергайсиз.Аввалроқ Ўзбекистон Президенти матбуот котиби Комилжон Алламжонов ҳам ушбу ҳодисага муносабат билдириб, «фожиага олиб келган сабаблар ҳозирда ўрганилаётгани» ва «натижасига кўра тегишли чоралар белгиланиши»ни маълум қилган эди.Ҳар бир инсон ҳаёти биз учун ўта муҳим ва содир бўлган воқеа йўлларда хавфсизликни кучайтириш заруратини билдиради. Вафот этган аёлнинг оила аъзоларига маънавий ва моддий ёрдам кўрсатилади. Бундан ташқари, ушбу ҳодиса холис суриштирилиши ва ҳуқуқий баҳо берилиши таъминланишига сўз бераман.
Бахтсиз ҳодисанинг Давлатимиз раҳбарининг вилоятимизга ташрифи билан боғлаб, оммавий ахборот воситаларида турли хабарлар ва муносабатлар билдирилаётгани нохолис талқин ҳисобланади ва ҳақиқатга мос келмайди. Шу муносабат билан жамики оммавий медиа вакилларини ушбу ҳолатни ёритишда холисоналикка риоя қилишга, бир томонлама ёндашувдан қочишга чақирамиз.
Ижтимоий соҳа ходимлари маҳаллий ҳокимият органлари ва бошқармалар томонидан ҳудудларни ободлаштириш ишларига чиқарилмаган ва бундан кейин ҳам жалб қилинмаслигига вилоят раҳбари сифатида сўз бераман.
Туробжон Жўраев, Самарқанд вилояти ҳокими
Самарқанд вилоятидаги журналистларнинг маълум қилишича, Диана Еникеева айнан Президент ташрифи арафасидаги тозалаш ва ободонлаштириш ишларига жалб этилган эди. Қайд этишларича, ҳатто унинг ўлими ҳам кейинги кунларда бошқа ўқитувчиларнинг катта йўллар ёқасида ишлашдан қутқара олмаган.
Изоҳ (0)