Сўнги пайтда Тошкент шаҳрининг марказий кўчаларида ажабтовур ойнаванд бекатлар пайдо бўлди. Бу ҳақда ЎзА ҳикоя қилмоқда.
Йўловчилар учун барча қулайликлар яратилган: юмшоқ ўриндиқлар, иситиш ва совутиш мосламалари, шу йўналишда қатнайдиган транспорт воситаларининг электрон рўйхати, WiFi тармоғи, телефон апаратларига қувват берувчи мосламалар мавжуд бундай бекатлар афсуски, кўп эмас.
Масалан, Изза мавзеси ва Тошкент марказий универмаги йўналишида қатнайдиган 13-автобус йўналишидаги кўплаб бекатларда йўловчилар учун умуман қулайлик йўқ. Ҳатто айрим жойларда бекатнинг ўзи ҳам йўқ. Бекатларнинг тозалиги ҳақида гапирмаса ҳам бўлади.
Тошкент кўчаларида замонавий, барча қулайликларга эга ойнаванд бекатлар ҳам борлигини айтдик. Бироқ масаланинг бошқа томони ҳам бор: бундай бекатлар дўкон билан қўшиб қурилган. Ўз-ўзидан маълумки, дўкондор келиб дўконини очмагунча бекатга киролмайсиз.
—Автобуслар тўхтайдиган жойлардаги бекатларнинг талабга жавоб бермаслиги нафақат йўловчи, балки ҳайдовчиларга ҳам ноқулайликлар келтириб чиқаради, — дейди исм-шарифини билдирмаган 13-автобус ҳайдовчиси. — Бекатлар йўқлиги ҳайдовчини чалғитади. Тўхташ лозим бўлган жойлар баъзан турли машиналар билан банд бўлади. Бу эса айрим ҳолларда йўл- транспорт ҳодисалари, тўқнашувларни келтириб чиқармоқда.
Изоҳ (0)