Ўзбекистон ТИВ Тошкент конференциясига Қатар ҳам таклиф қилинганини расман тасдиқлади

Ўзбекистон Ташқи ишлар вазирлиги Россиянинг «Россия Сегодня» ахборот агентлиги саволига жавоб берди. Жавоб вазирлик расмий сайтига жойланди.

Савол: Яқинда Тошкентда Афғонистон бўйича юқори даражада бўлиб ўтадиган халқаро конференцияда қатнашиш учун Қатарга таклифнома жўнатилгани ҳақида хабар пайдо бўлди. Қатарда «Толибон» ҳаракати ваколатхонаси жойлашганини ҳисобга олиб, унинг вакилларининг Тошкент форумида қатнашиш эҳтимоли ҳақидаги масалага тўхталиб ўтмайсизми?

Жавоб: ТИВ расман тасдиқлайдики, таклифнома афғон муаммоси бўйича кўплаб ташаббуслар, хусусан, Халқаро алоқа гуруҳи, «Кобул жараёни» ва бошқаларнинг фаол иштирокчиси бўлган ҳамда «Толибон» иштирокида тинчлик жараёнини ташкиллаштиришда муҳим роль ўйнаши мумкин бўлган давлат — Қатарнинг ташқи ишлар вазирлигига йўналтирилди.

Шу муносабат билан таъкидлашни истардикки, Қатарни таклиф қилиш ташаббуси Ўзбекистон билан бирга халқаро конференция ўтказилишини бошлаб берган Афғонистон томонидан илгари сурилган.

15 мартга қадар юқори даражадаги конференцияга таклиф қилинган давлатлар ва халқаро ташкилотларнинг деярли барчаси ўз иштирокини тасдиқлади. Қатар вакилларининг расмий жавоби яқин вақтлар ичида кутилмоқда.

Бугунги кунда якуний Тошкент декларацияси лойиҳаси устидаги биргаликдаги ишлар эксперт даражасида давом этмоқда.