Россия ташқи ишлар вазири Сергей Лавров Афғонистон масаласи бўйича 27 март куни Тошкентда бўлиб ўтадиган халқаро анжуманда иштирок этади. Бу ҳақда Россия ТИВ расмий вакили Мария Захарова маълум қилди, деб хабар берди «ТАСС».
«Сергей Лавров 27 март куни Афғонистон бўйича «Тинчлик жараёни, хавфсизлик соҳасида ҳамкорлик ва минтақавий шериклик» халқаро анжуманида иштирок этади. Анжуман Тошкентда бўлиб ўтади», — дейди Захарова.
Вазирлик расмий вакилининг сўзларига кўра, учрашув Афғонистондаги тинчлик жараёнининг асосий тамойилларини ва хавфсизлик масалалари бўйича минтақавий ҳамкорлик йўлларини қидиришга, шунингдек, Афғонистонга Марказий Осиё ҳамда бошқа мамлакатлардан савдо, транзит, энергетика, маданий-гуманитар ҳамкорларни жалб этиш бўйича кенг миқёсли халқаро консенсусни шакллантиришга қаратилган.
Шунингдек, дипломат Тошкентда бўлиб ўтадиган анжуман жаҳон ҳамжамиятининг Афғонистондаги вазиятни барқарорлаштириш учун қилаётган саъй-ҳаракатининг давоми бўлиб хизмат қилишини таъкидлади.
Изоҳ (0)