Япониянинг Ўзбекистондаги фавқулодда ва мухтор элчиси Ито Нобуаки бугун Миллий олимпия қўмитасига ташриф буюрди, деб хабар бермоқда МОҚ ахборот хизмати.
Қайд этилишича, элчини МОҚ президенти Умид Аҳмаджонов ҳамда Жисмоний тарбия ва спорт вазири Шоакрам Исроиловлар кутиб олган.
МОҚ раҳбари икки давлат ўртасидаги спорт алоқаларни янги даражага кўтариш, Япония Миллий олимпия қўмитаси билан ҳам ҳамкорлик ишларини ўрнатиш истагида эканлигини таъкидлаб ўтган. Ўзбекистон Токио-2020 Олимпия ўйинларига тайёргарликни жадал суратларда давом эттирмоқда. Умид Аҳмаджонов ўзбек спортчилари кунчиқар юртда ўқув-машғулот йиғинларини ўтказишлари, маҳаллий иқлим ва шароитга мослашишлари учун у ердаги халқаро турнирларда иштирок этишлари фойдадан ҳоли бўлмаслигини, Япония спортидан кўп нарса ўрганса бўлишини айтиб ўтган.
Шоакром Исроилов эса Японияда ва Ўзбекистон давлат Жисмоний тарбия университетлари ўртасида меморандум имзоланганлиги, яқин алоқалар йўлга қўйилганлигини қайд этиб ўтди ҳамда япониялик мутахассисларни Ўзбекистонга олиб келишда элчидан амалий ёрдам кўрсатишини сўрагани айтилади хабарда.
Шунингдек, МОҚ раҳбари учрашув давомида Япония дзюдо ватани эканлиги, Токиодаги жаҳонга машҳур «Кодокан» дзюдо маркази билан ҳамкорликни йўлга қўйиш таклифини ўртага ташлаган.
Таъкидланишича, спорт курашлари ва дзюдо бўйича Ўзбекистон терма жамоалари Олимпиадага Японияда тайёргарлик кўради.
Элчи Ито Нобуаки МОҚқа амалга оширган ташрифи давомида қўмитанинг музейи, ташкилот ҳудудида жойлашган Республика спорт тиббиёти илмий-амалий марказини ҳам кузатган.
Учрашув сўнггида Умид Аҳмаджонов ва Шоакрам Исроиловлар элчига меҳмонга эсдалик совғаларини топширган.
Изоҳ (0)