«Матбуот тарқатувчи» акциядорлик компанияси ҳамда ушбу тизимдаги корхоналар орқали республика ва маҳаллий миқёсдаги босма даврий нашрлар тарқатилади. Газета ва журналларни тарқатиш 117 йўналишда, қарийб 18 минг километр масофада амалга оширилади, дея хабар беради Biznes-Daily.
Мазкур компаниянинг истиқболли ривожлантириш ва молия бўйича директори Маҳмуд Ориповнинг билдиришича, бугунги кунда битта «Матбуот» киоскининг нархи ўртача 35-37 миллион сўмни ташкил этади. Умумий ҳисоблаганда, ҳар бир янги киоскни савдо жойига ўрнатиш компанияга ўртача 39 миллион сўмга тушади.
Шу сабаб киосклар харажатларини қоплаш, унинг рентабеллигини ошириш мақсадида қўшимча хизмат тури ва сотиладиган товарлар ассортиментини кўпайтириш бўйича ишлар олиб бориляпти. «Матбуот» киоскларининг вазифалари кенгайтирилиб, уларнинг аҳолига ахборот, рекламага оид, турли хилдаги тўловларни қабул қилиш, интернет-дўконлар буюртмаларини бажариш каби хизмат турларини кўрсатиши ҳам йўлга қўйилган.
Тез орада анъанавий «Матбуот» киосклари ҳозирги даврнинг талаб ва таклифига асосан замонавийлаштирилади — улар умумий мультимедиа марказларига айлантирилади. Бундай киоскларда аҳолига ижтимоий аҳамиятга эга хизматлар бажарилади. Хусусан, тўлов терминаллари, интерактив карта, Wi-Fi орқали маълумотларни узатиш, интернет буюртмаларини бериш, уларни етказиш каби хизмат турлари кўрсатилади.
Изоҳ (0)