Бугун, 13 март куни Қуръон мусобақаси — 2018 Фарғона вилоят босқичи Фарғона шаҳридаги «Файз» тўйхонасида бошлангани, лекин ИИБ ходимлари журналистларни у ерга киритмагани ҳақида хабар берилган эди. Мусобақани кузатиш учун борган «Дарё» мухбири Муҳаммаджон Обидовнинг хабар беришича, вилоят ҳокими ўринбосари Қамариддин Имoмов ушбу масалани ҳал қилишда ёрдам кўрсатган. Мусобақани кузатиш учун келган минглаб ихлосмандлар ва журналистлар учун қўшимча шароитлар яратилган.
Айни дамда «Файз» ва «Давр саройи» тўйхоналарида тиловат ва ҳифз йўналишида мусобақанинг шаҳар, туман босқичи 37 нафар эркак ва 19 нафар қиз-аёл ғолиблари баҳслашмоқда.
«Қуръон мусобақасининг дастлабки босқичида вилоятимиздаги 1244 нафар қори ва қориялар қатнашган эди. Бу республика бўйича энг катта кўрсаткич. Ҳолбуки, Фарғона вилоятида диний мадраса, Қуръон ўқитиш мактаби йўқ. Муҳтарам Президентимиз ташаббуслари билан Фарғона фиқҳ мактаби очилди ва унда ўн нафар имом-хатиблар таҳсил оляптилар. Иншооллоҳ, мадраса ҳам очилишидан умидвормиз. Бугун мусобақа якунига етиб ғолиблар аниқлангач, унинг иштирокчилари диний идора вакиллиги ташкилотчилигида Марғилон ва Фарғона меҳрибонлик уйларига бориб 9 миллион сўмлик совға-саломларини топшириш ҳам режалаштирилган», – дейди Ўзбекистон мусулмонлари идораси Фарғона вилоят вакили ўринбосари Алишер Наимов.
Қуръон мусобақаси низомда белгиланганидек, 18—25 ва 25—40 ёшли қори ҳамда қориялар ўртасида ўтмоқда. Уни кузатишга келган, лекин «Файз» саройига сиғмаган мухлислар учун тўйхона ҳовлисига улкан видеомонитор ҳам ўрнатилди.
Изоҳ (0)