Сўнгги вақтларда Тошкентда шаҳар иморатларининг тиғизлашуви тенденцияси кузатилмоқда, деб ёзади «Nuz.uz».
Тошкент маркази шаҳарнинг бизнес қисмига айлантирилиб, бузилаётган уйларда яшовчилар шаҳар чеккасига кўчирилаётган бир пайтда уддабурон девелоперлар чаққон архитекторлар билан бирга ечим топмоқда, дейилади мақолада. Улар даҳалардаги иморатларни тиғизлаштирмоқда. Шу тариқа эса шаҳарни атайлаб бўш қолдирилган ерлардан маҳрум этмоқда ва экологик вазиятни бузмоқда.
Кўп қаватли уйлар орасида авваллари одамлар дарахтлар эккан, соя-салқин бўлган, болалар ўйнаган ва катталар ҳам нафас ростлаган бўш жойлар эгалланиб, шу ерларда янги уйлар қурилмоқда. Таъкидланишича, бу ердаги инфратузилма: энергия, газ, иссиқлик, сув таъминоти ва канализация мавжуд уйлар ва иншоотларга мўлжалланган. Энди бу инфратузилма қўшимча юкламани кўтара оладими? — деган масала кўтарилади мақолада.
Тошкентда бундай тарзда иморатлар қурилаверса, у тез орада пастқам ва жин кўчаларга тўла шаҳарга айланади ва ўзининг кўкаламзор шаҳар сифатидаги шуҳратини йўқотади, дея хулоса қилинади.
Изоҳ (0)