Ўзбекистон Ички ишлар вазири Пўлат Бобожонов 2017 йил давомида Қорақалпоғистон Республикаси, Тошкент шаҳри ва барча вилоятларда сайёр қабуллар ўтказди. Бу ҳақда ИИВ маълум қилди.
Сайёр қабулларда жами 6067 нафар фуқаро қабул қилинди. Улардан турли мазмундаги 3760 мурожаат келиб тушди.
Мурожаатларнинг 1388 таси ички ишлар органларига ишга қайта тиклаш, 243 таси ички ишлар органларига ишга кириш, 541 таси ички ишлар органларидаги терговга қадар текширув, дастлабки тергов ва суриштирув ҳамда 394 таси паспорт-виза масалаларига оид бўлди.
Оила-турмуш доирасидаги келишмовчиликларга доир мурожаатлар 125 тани, турли ижтимоий-иқтисодий масалаларга доир мурожаатлар 522 тани ташкил этди. 102 та мурожаатда эса ички ишлар органлари ходимларининг ноўрин хатти-ҳаракатлари баён қилинган. Шунингдек, 445 мурожаатда бошқа турли масалалар ўз аксини топди.
Мурожаатларнинг 340 таси сайёр қабул жараёнида ижобий ҳал этилди. 731 мурожаат эса қабулдан сўнг кўриб чиқилиб, ижобий ҳал этилди. 2558 мурожаат юзасидан тушунтириш берилди, 131 тасини қаноатлантириш рад қилинди.
Сайёр қабуллардан бирида Андижон вилоятининг Шаҳрихон туманида яшовчи Гулзира Мўйдинова таниши Х. Абдулазизовга эшик ясаб бериши учун 600 доллар бергани, аммо орадан анча вақт ўтганига қарамасдан дурадгор ваъдасининг устидан чиқмаганлиги, боз устига, пулни қайтармаётганлигидан норози бўлиб мурожаат қилди. Фуқаронинг мурожаати тегишли тартибда ўрганиб чиқилди ва унга пули ундириб берилди.
Қашқадарё вилоятининг Шаҳрисабз туманида истиқомат қилувчи Муҳаббат Насруллаева эса сайёр қабулда қизи М. Бобоёрова олий ўқув юртига контракт асосида ўқишга киргани муносабати билан унга банкдан 4 йил муддатга таълим кредити олишга ёрдам беришни сўради. Ушбу мурожаат ижобий ҳал қилинди – М. Бобоёровага таълим кредити ажратилди.
Шунингдек, Сирдарё вилоятининг Сирдарё туманида яшовчи опа-сингиллар Мавлуда, Камола ва Шоҳида Ҳасановалар иш билан таъминлашда амалий ёрдам беришни сўраб мурожаат қилди. Мазкур мурожаат назоратга олиниши натижасида улар шу куннинг ўзида Гулистон шаҳридаги «Бектекс» масъулияти чекланган жамиятига ишга жойлаштирилди.
Сайёр қабуллар якуни юзасидан жойларда ўтказилган муҳокамалар жараёнида ички ишлар органлари тизимида коррупция ва унинг турли кўринишларига қарши курашиш, шахсий таркиб ўртасида тамагирлик ва порахўрлик каби салбий иллатларга йўл қўймаслик, бу борада тарбиявий ишларни кучайтириш, шунингдек, аҳолининг ҳуқуқий маданиятини оширишга қаратилган тарғибот-ташвиқот ишларини янада жадаллаштириш бўйича вазифалар белгилаб олинди.
Изоҳ (0)