Ўзбекистон Президентининг 6 мартдаги қарорига асосан, Мақсуджон Юлдашев Ўзбекистон мактабгача таълим вазири ўринбосари этиб тайинланди. Вазирлик матбуот хизматининг ахборотига кўра, Юлдашев 9 март куни вазирлик жамоасига бош вазир ўринбосари Қаҳрамон Акмалов томонидан таништирилган.
Мақсуджон Юлдашев 1978 йилда туғилган. 1999 йил Тошкент давлат иқтисодиёт университети бакалавр босқичини, 2002 йилда шу университет магистратурасини, 2010 йилда эса Президент ҳузуридаги Давлат ва жамият қурилиши академиясини тамомлаган.
Меҳнат фаолиятини 2000 йили «Устоз» жамғармаси услубчиси сифатида бошлаб, 2003 йилга қадар шу жамғармада фаолият кўрсатган. 2003—2009 йилларда Ўзбекистон Президентининг «Истеъдод» жамғармаси иқтисодчиси ва бош ҳисобчиси, 2010—2012 йилларда Халқ таълими вазирлиги Назорат ва таҳлил бошқармаси бошлиғи, 2012—2016 йилларда Абдулла Авлоний номидаги халқ таълими педагог ходимларини қайта тайёрлаш ва малакасини ошириш марказий институти ректори, 2016—2017 йилларда Халқ таълими вазирлиги Таълим муассасалари фаолиятини ташкил этиш бош бошқармаси бошлиғи ва 2017 йилдан 2018 йилнинг 6 мартига қадар Президент Девони бош консултанти лавозимларида ишлаган.
«Шу вақтгача мактабгача таълим вазири ўринбосари лавозимида ишлаб келган Гулчеҳра Юлдашева бошқа ишга ўтганлиги муносабати билан, ушбу лавозимдан озод этилди», — дейилади вазирлик ахборотида.
Изоҳ (0)