Беларусь президенти Александр Лукашенко мамлакатнинг Ўзбекистондаги Фавқулодда ва мухтор элчиси лавозимига Леонид Маринични тайинлаш вақтида бу ерда амалга оширилаётган ислоҳотлар хусусида ўз муносабатини билдириб ўтди. Бу ҳақда «Beltа» ахборот агентлиги хабар тарқатди, дея маълум қилади «Халқ сўзи».
«Биз Ўзбекистонга нисбатан тўғри ва самимий бўлишимиз керак, чунки у ерда Беларусни ҳурмат қилишади. Доим ҳамкорликка тайёрмиз. Ўзбекистон биз учун устувор давлат», — таъкидлади Лукашенко.
Беларусь етакчиси икки мамлакат ўртасидаги муносабатлар Шавкат Мирзиёев Президентликка сайланганидан кейин фаол ривожланиб бораётганини эътироф этди. У билан бир неча бор учрашганини билдириб, «У ўз мамлакатига қанчалик эзгуликлар истаётганини кўриб турибман. Шавкат Мирзиёев Беларусни муҳим шерик деб билганлиги биз учун ҳам яхшилик аломати. Биз қисқа вақт ичида жуда кўп ишларни амалга оширдик. Шу боис яқин истиқболда Ўзбекистонга қиладиган сафарим давомида муайян вақт ичида бажарилган ишлар сарҳисоби ва муносабатларимиздаги янги босқич хусусида фикр алмашамиз»,— дея айтиб ўтган.
Ўзбекистонда Беларусда ишлаб чиқарилаётган техникаларга эҳтиёж юқорилигини инобатга олиб, Лукашенко янги тайинланган элчига мамлакатлар ўртасидаги савдо-иқтисодий ҳамкорликни ривожлантириш вазифасини юклади.
Изоҳ (0)