Бухоро вилояти ИИБ ЖҚБ тезкор вакиллари томонидан «назорат тариқасида гиёҳванд моддаларини сотиб олиш» тадбири ўтказилди, деб хабар беради вилоят ИИБ матбуот хизмати.
Ғиждувон туманида яшовчи Нусрат исмли шахснинг Ғиждувон тумани ҳудудида кўп миқдорда «наша» гиёҳвандлик моддаси сотиб юрганлиги тўғрисидаги маълумотга асосан, олиб борилган дастлабки тезкор-суриштирув ҳаракатлари жараёнида мазкур фуқаро Ғиждувон шаҳри, Дилкушо МФЙ, А.Ғиждувоний кўчаси 40-уйда яшовчи, 1960 йилда туғилган, муқаддам Ўзбекистон Республикаси Жиноят Кодексининг 273-моддаси (Гиёҳвандлик воситалари ёки психотроп моддаларни ўтказиш мақсадини кўзлаб қонунга хилоф равишда тайёрлаш, олиш, сақлаш ва бошқа ҳаракатлар қилиш, шунингдек уларни қонунга хилоф равишда ўтказиш) 5-қисми билан судланган Нусрат Восиев эканлиги аниқланди.
Нусрат Восиев назорат тариқасида гиёҳванд моддаси сотиб олиш учун юборилган шахсга ўзининг таниши бўлган, Ғиждувон тумани, Гулистонобод МФЙ, Работипоён қишлоғида яшовчи, 1968 йилда туғилган, муқаддам Ўзбекистон Республикаси Жиноят Кодексининг 164-моддаси (босқинчилик) билан судланиб жазо муддатини ўтаб чиққан Наби Қаҳҳоров билан жиноий тил бириктириб, ҳар бир қути «наша» гиёҳвандлик моддасини 400 000 сўмдан эканлигини айтиб, 4 дона «Спички» ёзувли гугурт қутисига солинган ҳолдаги 15,91 грамм «марихуанна» гиёҳвандлик воситасини ўтказган вақтда вилоят ИИБ ЖҚБ ходимлари томонидан жиноят устида қўлга олинади.
Ушбу ҳолат юзасидан тегишли тартибда ҳужжатлар расмийлаштирилиб, гиёҳфурушларга нисбатан жазонинг муқаррарлигини таъминлаш чоралари кўрилди, дейилади хабарда.
Изоҳ (0)