Савдо-саноат палатасининг Самарқанд вилоят ҳудудий бошқармасида «Марказий Осиёда барқарор иқтисодий ривожланишни таъминлаш учун бизнес уюшмалар орқали қишлоқ туризми ва экотуризмни кучайтириш» лойиҳаси доирасида семинар ташкил этилди. Бу ҳақда «Зарафшон» хабар бермоқда.
Кузатувларга кўра, қишлоқ туризмини ривожлантириш орқали шаҳарликларнинг қишлоқда, табиат бағрида ҳордиқ чиқаришларига замин яратилади, маблағлар қишлоққа йўналтирилади ва табиий тоза қишлоқ хўжалик маҳсулотларидан баҳраманд бўлинади. Европа давлатларида шу уч йўналиш кенг ривожланган.
—Бизда ҳам туризмнинг ҳар бир соҳаси, хусусан, қишлоқ туризмини тараққий эттириш учун барча имкониятлар етарли, — дейди Савдо-саноат палатаси бош мутахассиси Сардор Бобоқулов. — Афсуски, қишлоқ туризмини қўллаб-қувватловчи ҳуқуқий ҳужжатларнинг йўқлиги, соҳанинг ривожланишини рағбатлантириш бўйича минтақавий дастурларнинг сустлиги ва тўсиқ бўладиган бир қатор муаммолар сабаб бу соҳада оқсоқликлар кузатилмоқда. Шунинг учун бу каби камчиликларни бартараф этишда республикадаги уч туман — Риштон, Ургут ва Нурота тажрибавий ҳудудлар сифатида танлаб олинди. Бу ердаги мутахассислар учун Қирғизистонда ўқув ташкил этилди.
Семинарда олимлар ва соҳа мутахассислари қишлоқ туризми борасидаги тажрибалар билан ўртоқлашди. Шунингдек, Нурота туманидаги Сентоб қишлоғида туристларни жалб қилиш усуллари ва улар учун яратилган қулайликлар, Риштон туманидаги уй-меҳмонхонада сайёҳларга миллий анъаналар асосидаги меҳмондўстлик жараёнлари акс этган роликлар намойиш этилди.
Изоҳ (0)