Тошкент шаҳрида тўхташ ёки тўхтаб туриш қоидасини бузган ҳайдовчиларга нисбатан чоралар қатъийлашмоқда. Бу ҳақда «Ўзбекистон 24» телеканалининг «Ахборот 24» информацион дацурида маълум қилинди.
Ўз навбатида, Тошкент шаҳар ИИББ матбуот хизмати хабарига кўра, тўхташ ёки тўхтаб туриш қоидасини бузган ҳайдовчиларга нисбатан жойида маъмурий баённомалар расмийлаштириб келинмоқда. «Агарда ҳайдовчи бўлмаса ва тўхташ ёки тўхтаб туриш қоидаларига риоя қилинмаганлиги оқибатида мазкур транспорт воситаси йўл ҳаракати иштирокчиларининг ҳаракатланишига халақит берса, Маъмурий жавобгарлик тўғрисидаги Кодекснинг 291-моддасига асосан, транспорт воситаси махсус тўхташ жойлари (жарима майдони)га эвакуация қилинмоқда», — дейилади бошқарма ахборотида.
Қайд этишларича, Ўзбекистон Президентининг 14 февралдаги қарорида икки ой ичида Тошкент шаҳрида транспорт воситалари ҳайдовчилари томонидан тўхтаб туриш қоидаларини бузиш билан боғлиқ маъмурий ҳуқуқбузарликлар тўғрисидаги ишларни юритишнинг соддалаштирилган тартибини жорий этиш тўғрисида таклифлар киритиш белгиланган эди. «Мазкур Қарор талаблари ижроси юзасидан тегишли таклифлар тайёрланмоқда», — дейилади ИИББ ахборотида.
Бошқармадан маълум қилишларича, ҳозирги вақтда Тошкент кўчалари ва йўлларида ўрнатилган 3.27 («Тўхташ тақиқланган») ва 3.28 («Тўхтаб туриш тақиқланган») йўл белгиларини хатловдан ўтказиш ишлари олиб борилмоқда. Хатлов давомида ҳозирги кунда ўз аҳамиятини йўқотган йўл белгиларини олиб ташлаш, шунингдек, 3.27 («Тўхташ тақиқланган») йўл белгиларини 3.28 («Тўхтаб туриш тақиқиланган») йўл белгиларига алмаштириш чоралари ҳам кўрилмоқда.
Маълумот учун, ҳайдовчилар томонидан тўхташ ёки тўхтаб туриш қоидаларини бузиши энг кам иш ҳақининг уч баравари (22 февраль ҳолатига кўра — 516 720 сўм) миқдорида жарима солишга сабаб бўлади. Агар жазо қўлланилганидан сўнг бир йил ичида шундай қоидабузарлик бир марта такрор содир этилса, жарима миқдори 861 200 сўмни, икки марта содир этилса 1 722 400 сўмни, уч ва ундан ортиқ марта содир этилса 2 583 600 сўмни ташкил этади.
Изоҳ (0)