Бельгиялик шифокорлар беморнинг хоҳишини ҳисобга олмасдан, унинг ҳаётига нуқта қўйди

Бельгияда шифокорлар беморнинг оиласи сўровига кўра эвтаназияни амалга оширди. Аммо бунда беморнинг хоҳиш-истаги ҳисобга олинмади, деб ёзади Daily Mail.

Шифокорларнинг ушбу соҳадаги ёмон назорати туфайли Эвтаназия бўйича давлат комиссиясидан кетган Виллем Дистелманснинг очиқ хатидан кейин шов-шув келиб чиқди.

Унинг сўзларига кўра, шифокорлар Паркинсон касаллигидан азоб чеккан кекса беморнинг ҳаётига нуқта қўйган. Дистелманс даъво қилишича, бемор эвтаназияга розилик берган бўлиши мумкин эмас — унинг саломатлиги ихтиёрий равишдан шифокорлардан ушбу жараённи амалга оширишни сўраш учун имкон бермаган. Бундан ташқари, у бирор марта ҳам ҳаёт билан видолашиш истагини намоён қилмаган. Шунга қарамай, қариндошлари илтимоси билан беморни ўлдиришган.

Дистелманс ушбу ҳодисани қотиллик деб баҳолаш мумкин деб ҳисоблайди, аммо шифокорлар комиссияси аъзолари ишонч билдиришича, беморнинг азобларини енгиллаштириш учун наркотиклар киритилган, ўлимга айнан шу сабаб бўлган.