Янги ташкил этилаётган футбол бўйича Ўзбекистон Супер Лигаси беллашувларига тақвим тузиб чиқилганди. Энди ўйинлар ўтадиган саналар аниқ бўлди.
Аввалроқ ЎФА биринчи вице-президенти Умид Аҳмаджонов тақвим тузишда мухлислар имкониятини ҳисобга олиш кераклигини айтганди. ПФЛ сайтидаги хабарда мана шу масалага тушунтириш берилган. Боиси, Супер Лига тақвимида бегим кунларидаги ўйинларни ҳам учратиш мумкин.
Супер Лиганинг 1-босқичидаги 22 турда жами 132 та беллашув бор. Шулардан 5 та ўйин — душанбага, 8 таси — сешанбага ва 11 таси — чоршанбага тўғри келган. Қолган 108 та учрашув ҳафтанинг иккинчи ярмида бўлиб ўтади. Масалан, шанба кунига энг кўп — 38 та ўйин тушган. Ўзбекистон Кубогининг 1/32 финалидан жой олган беллашувлар эса якшанбада ўтади.
Нега бундай бўлиб чиқди?
Мамлакатнинг икки етакчиси — «Локомотив» ва «Насаф» Чемпионлар Лигасида тўп суради. Мазкур мусобақа беллашувлари душанба, сешанба ва чоршанба кунлари бўлиб ўтади. Демак, Ўзбекистон жамоалари хорижга энг камида дам олиш кунлари чиқиб кетиши керак бўлади. Бу биринчи сабаб.
Иккинчидан, орада Ўзбекистон Кубоги беллашувлари ҳам ўтиши инобатга олинса, жамоаларда кейинги ўйинлар учун тикланиш учун вақт бўлиши керак.
Учинчидан, Ўзбекистон миллий терма жамоасини олдинда Сенегал, Марокаш ва Эронга қарши 3 та халқаро ўртоқлик ўйини кутиб турибди. Супер Лига беллашувлари ФИФА кунларидаги ҳолатни ҳам инобатга олиши керак бўлади.
ПФЛ Аҳмаджонов топшириғида кўрсатилган кунлардан бошқа, яъни, бегим кунларига ўйин тайин қилган бўлса ҳам, уларнинг вақтини назорат қилади. Яъни, ўйинлар аввал бўлгани каби иш вақтида бошланмайди. ПФЛ клублар олдига беллашувларни 18:00 дан эрта бошламаслик талабини қўяди.
Изоҳ (0)