UNICEF Ўзбекистон Хотин-қизлар қўмитаси томонидан давлат органлари, нодавлат-нотижорат ташкилотлар ва UNICEF билан ҳамкорликда тайёрлаган қизлар учун ихтисослашган таълим муассасаларида таълим, тарбия ва реинтеграцияни яхшилашга қаратилган Идораларо ҳаракат дастури қабул қилинганини маъқуллайди.
«Шуниси мақтовга сазоворки, 2018 йил 4 январда Ўзбекистон Республикаси Ҳукумат- томонидан қабул қилинган 10-11-01 сонли Ҳаракат дастури ихтисослашган таълим муассасаларидаги қизларнинг ҳолатини яхшилашни, ҳар бир қизнинг индивидуал ҳолатини баҳолашни, шунингдек индивидуал реабилитация режаларини ишлаб чиқиш учун тегишли давлат идоралари чора-тадбирлар кўришларини талаб қилади, — деди UNICEF’нинг Ўзбекистондаги ваколатхонаси раҳбари Саша Грауманн. — Қизлар билан ишлашда ижтимоий иш амалиётларини қўллаш ҳамда уларнинг эҳтиёжлари ва вазиятларига жавоб бериш жуда муҳимдир. Maxсус чора-тадбирлар қизларнинг оилаларига ва жамиятга реинтеграциясига ёрдам беришини Ҳаракат дастури таъминлайди. Бу БМТ Бола ҳуқуқлари бўйича қўмитасининг озодликдан маҳрум этилган болаларнинг ҳолатига доир 2013 йилда Ўзбекистонга берган тавсияларини, шунингдек қизлар ва ёш аёллар орасида жиноятчиликнинг олдини олиш тўғрисидаги Ўзбекистон миллий сиёсатини бажариш бўйича ҳукумат томонидан қўйилган муҳим қадамдир».
Ўзбекистонда вояга этмаган ҳуқуқбузарлар учун тўртта ихтисослашган таълим муассасаси мавжуд. Улардан иккитаси 11—14 ёшли ва 14—18 ёшли қизларга мўлжалланган. Мазкур муассасалар фаолияти болаларни жиноятчиликдан қайтариш, таълимни такомиллаштириш ва уларни профессионал касб-ҳунар билан таъминлашга қаратилган.
2017 йил сентябрь ойида UNICEF ва Бош прокуратура вакиллари муассасаларга ташриф буюрган эди. Шундан кейин UNICEF Хотин-қизлар қўмитасига ва бошқа тегишли идораларга ихтисослашган таълим муассасаларидаги қизларнинг аҳволини яхшилаш учун техник кўмак кўрсатишга тайёр эканлигини билдирди.
UNICEF халқаро стандартларга мувофиқ равишда ҳамда ҳуқуқбузарлик қилиш хавфи бўлган болалар билан ишлаш бўйича бошқа мамлакатларнинг илғор тажрибасидан фойдаланиб, Ҳаракат дастурини амалга ошириш учун Ўзбекистон ҳукуматига техник ёрдам кўрсатишга тайёр эканлигини яна бир бор тасдиқлайди.
Изоҳ (0)