Президент девонида тузилган ишчи гуруҳи Қуйичирчиқ туманидаги ўрганишлари чоғида Беруний маҳалласидаги хонадонларнинг эски ҳаммомида қаровсиз қолдирилган қарияни аниқлади. Бу ҳақда «Xabar.uz» маълум қилди.
Мамадали Салямов 1931 йилда туғилган, Оққўрғон тумани, Ҳамид Олимжон қишлоғида доимий рўйхатга олинган. Нафақага ҳужжатлар расмийлаштирилмаган, ақли заиф, кўзи кўрмайди. Собиқ иттифоқ паспорти нусхаси мавжуд.
Ўзини назорат қилолмаганлиги сабабли туманнинг Беруний маҳалла фуқаролар йиғинидаги икки фарзанди олдига яшаш учун келган. Бироқ улар алоҳида уй-жойи бўлса ҳам, отасини қаровига олишдан бош тортган. Яна бир фарзанди — қизи эса отасига уйидаги эски ҳаммомдан жой берган.
Беруний маҳалла фуқаролар йиғини раиси К. Эргашев ва маҳалла посбони А. Жўраев М. Салямовнинг нафақасини расмийлаштириш бўйича ўғли билан мунтазам суҳбатлашиб, тушунтириш бериб келган. Фарзандларнинг бу ҳолатга бефарқ қараганлиги, унинг ўзи Оққўрғон туманида доимий рўйхатдан ўтганлиги сабабли маҳалла фуқаролар йиғини томонидан Оққўрғон тумани пенсия жамғармасига мурожаат қилинган. Маҳалла фуқаролар йиғини томонидан ҳолат бўйича М. Салямовнинг зарур ҳужжатларини расмийлаштириш юзасидан фарзандларига берилган маслаҳатлар натижасиз қолиб кетган.
Президент девони ишчи гуруҳи томонидан шу куннинг ўзида М. Салямов шифохонага ётқизилиб, барча зарурий чоралар кўрилди. Яшаш шароитини яхшилаш бўйича маҳаллий ҳокимлик вакиллари билан ҳамкорликда иш олиб борилмоқда.
Изоҳ (0)