Халқ таълими вазирлиги томонидан ўрта таълим муассасаларининг 9-10-синф ўқувчилари ўртасида инглиз тилида «My motivation to study» – «Менинг ўқишга бўлган иштиёқим» мавзусида республика иншолар кўрик-танлови ташкил этилди. Бу ҳақда вазирлик матбуот хизмати хабар бермоқда.
Ўзбекистон Республикаси Халқ таълими вазирлиги, Ўзбекистон инглиз тили ўқитувчилари уюшмаси ҳамда БМТнинг таълим, фан ва маданият масалалари бўйича ташкилоти (ЮНЕСКО) билан ўзаро ҳамкорлигида ташкил этилган кўрик-танлов «Таълим, фан ва маданият» шиори остида ўтказилди.
Мазкур кўрик-танлов ўқувчи-ёшлар орасидан илғор, ташаббускор, ижодкор аниқлаш, шунингдек, уларнинг ижодий фаоллигини ошириш, ҳар томонлама қўллаб-қувватлаш ва рағбатлантириш орқали чет тилларига бўлган қизиқишларини ошириш мақсадида ташкил қилинди.
Икки босқичда (ҳудудий ва республика) ташкил қилинган танлов иштирокчиларнинг ижодий ишлари 100 баллик тизимда баҳоланиб, ҳакамлар ҳайъати томонидан баҳолаш жараёнида иншо мазмунининг баён этиш равонлиги, ўқув-услубий ва дидактик талабларга жавоб бериши, бадиий савияси ва ҳақиқий мисоллар орқали таъсирчанлик даражаси каби мезонлар эътиборга олинди.
Танловнинг ҳудудий босқичларида ўқувчилар томонидан 3200 дан ортиқ иншолар келиб тушган бўлиб, иншолари энг яхши ғояга эга бўлган 42 нафар ўқувчилар якуний босқичга иштирок этиш имкониятига эга бўлди.
Иншолар танловининг республика босқичи ғолиблари 8—9 февраль кунлари аниқланди.
Изоҳ (0)