Урганч шаҳрида Ўзбекистон—Корея бизнес-форуми ўтказилди

2018 йил 30 январь куни Ўзбекистон Савдо-саноат палатаси томонидан Корея ишбилармон доира вакиллари ҳамда маҳаллий тадбиркорлар иштирокидаги Ўзбекистон—Корея бизнес-форуми ўтказилди. Бу ҳақда Ўзбекистон Савдо-саноат палатаси матбуот хизмати хабар берди.

Тадбирни ташкил этишдан кўзланган асосий мақсад Ўзбекистон ва ушбу минтақанинг экспорт, инвестиция ва туристик салоҳиятини намойиш этиш, шунингдек, икки давлат тадбиркорлари ўртасида савдо алоқаларини йўлга қўйиш ва кенгайтиришни қўллаб-қувватлаш, янги қўшма корхоналар сони ҳамда икки томонлама маҳсулот айланмасини оширишдан иборат.

Форумда Жанубий Кореяда қурилиш, косметика, савдо, заргарлик буюмлари, шахсий гигиена буюмлари, газбаллон ускуналари, қишлоқ хўжалиги машиналарини ишлаб чиқариш, тўқимачилик ва тўқимачилик қурилмалари соҳасида фаолият юритувчи йирик компанияларнинг 30 дан ортиқ вакили, шунингдек, Хоразм вилоятининг Корея компаниялари билан ҳамкорликни йўлга қўйишга қизиқиш билдирган йирик корхона ва компанияларнинг 150 дан ортиқ вакили иштирок этди.

Ишбилармонлик учрашуви чоғида икки давлат тадбиркорлари ўртасидаги ўзаро ҳамкорликни мустаҳкамлаш бўйича масалалар муҳокама қилинди. Қайд этиш керакки, Ўзбекистон Марказий Осиё давлатлари ичида Кореянинг асосий савдо ҳамкори ҳисобланади, жумладан Корея Республикасининг минтақа давлатлари билан маҳсулот айланмаси ҳажмининг ярмидан ортиғи Ўзбекистон улушига тўғри келади.

Асосий экспорт позициялари: транспорт, қурилиш ва туризм хизматлари, пахта толаси, пластмасса ва ундан ясалган буюмлар, қурилиш материаллари, толали масса.

Импорт позициялари: автотранспорт воситаларининг қисмлари, механик ва электр ускуналари, пластмасса ва ундан ясалган буюмлар, қора металлдан ишланган буюмлар, кимёвий маҳсулотлар, резина маҳсулотлари ва ҳ.к.

Корея Республикасининг Ўзбекистон Республикасига жалб қилинган тўғридан-тўғри инвестициялари ҳажми 7 миллиард АҚШ долларидан ошди.

Бугунги кунда Ўзбекистон Республикасида Корея капитали иштирокидаги 460 дан ортиқ корхона фаолият юритмоқда (386 та қўшма корхона ва 100 фоиз корейс капиталига эга 75 та корхона). Ўзбекистонда Кореянинг 75 та компанияси ваколатхонаси аккредитациядан ўтган.