Бухорода қиморхона ташкил этган бир гуруҳ шахслар қўлга олинди ва уларнинг ноқонуний ҳаракатларига чек қўйилди. Бу ҳақда вилоят ИИБ маълум қилди, дея хабар беради UzNews.
Бухоро шаҳридаги Афросиёб кўчасида, собиқ Жондор автотураргоҳи олдида жойлашган уйда Омон Омонов қимор ўйини ташкил қилиб, унга ўзининг танишларини жалб қилган.
ИИБ томонидан ўтказилган тадбирда муқаддам судланган, Вобкент туманилик Умар Ҳасанов ҳамда муқаддам судланган, Бухоро шаҳрида истиқомат қиладиган Бобир Давлатов мазкур хонадонга қимор ўйнаш учун келганлиги аниқланди.
Шунингдек, Андижон вилоятидан келган «меҳмонлар» — Олтинкўл туманида яшовчи Давронбек Ахмедов ва Бекзод Ҳамроев қимор ўйнаётганларида ҳудудий профилактика инспектори ва тезкор ходимлар томонидан ушланди.
Улардан далилий ашё сифатида 2 пачка карта, 2 миллион сўмга яқин пул ва 150 доллар холислар иштирокида олинди. Қиморбозларга нисбатан тегишли ҳужжатлар расмийлаштирилиб, қонуний қарор қабул қилиниши учун суд идораларига тақдим қилинди.
Изоҳ (0)