Қуролли Кучлар академиясида «Мудофаа доктринаси – миллий хавфсизлигимизнинг мустаҳкам пойдеворидир» мавзусида илмий-амалий анжуман ўтказилди. Бу ҳақда «Дарё»га Мудофаа вазирлиги матбуот хизмати маълум қилди.
Ўтган йил барча жабҳалар каби ҳарбий соҳада ҳам туб ислоҳотларнинг янги босқичини бошлаб берди. Улар орасида Ўзбекистон Президенти, Қуролли Кучлар Олий бош қўмондони ташаббуси асосида Олий Мажлис палаталари томонидан янгиланган Мудофаа доктринасининг қабул қилиниши улкан сиёсий-ҳуқуқий аҳамиятга эга воқеа бўлди.
Мудофаа доктринаси давлат хавфсизлигини таъминлаш ва барқарор ривожланишининг асоси ва бу борада ҳар бир фуқаронинг унинг талабларини амалга оширишдаги ўрни ва роли беқиёс. Шу маънода ушбу анжуманнинг ўтказилиши кўриб чиқилаётган масаланинг қанчалар долзарблигини белгилаб беради.
Анжуман ишида Ўзбекистон Мудофаа вазири генерал-майор Абдусалом Азизов, Олий Мажлис Қонунчилик палатаси депутатлари, Мудофаа вазирлиги марказий аппарати бошқармалари, Қуролли Кучлар академияси раҳбарияти ва профессор-ўқитувчилари, Ҳарбий-илмий тадқиқотлар ва ўқув-услубий маркази зобитлари ва илмий ходимлари, олий ҳарбий таълим муассасалари вакиллари ва бошқа олий таълим муассасаларидан таклиф этилган мутахассислар қатнашди.
Тадбир онлайн тизимида Мудофаа вазирлиги қўшинларида намойиш этилди.
Изоҳ (0)