Ўзбекистонда нашр этиладиган «Овози тожик» газетасида Тошкент вилояти Бўстонлиқ туманидаги тожик тилли қишлоқлар аҳолиси номидан таҳририятга юборилган хат чоп этилди, деб ёзади UZ24. Унда маҳаллий мактабларда ўқитувчилар етишмаётганлиги масаласи кўтарилган.
Хатда қайд этилишича, илгари бундай мактаблар учун мутахассислар Ангрендаги Тошкент вилоят педагогика институтида тайёрланган. Аммо бир неча йилдан буён ушбу институт ёпиқлиги туфайли, тожик мактаблари учун кадрлар етишмаслиги ҳолати юзага келган. Агар бу муаммо бундан кейин ҳам ҳал этилмаса, у ҳолда эҳтимол, тожик мактаблари ёпилиши мумкин.
Ўзбекистон Президенти Шавкат Мирзиёев 2017 йилнинг 27 июлида Тошкент вилоятида Чирчиқ давлат педагогика институтини ташкил этиш тўғрисида қарор имзолаган эди. Бўстонлиқ туманидаги тожик тилли қишлоқлар аҳолиси ушбу ўқув муассасасида келажакда тожик тилида ўқитиладиган гуруҳлар очилса, муаммо ўз ечимини топишига умид билдирди. Ахир тожик синфлари ва мактаблари Ангрен, Чирчиқ, Бўка, Паркентда ҳамда Ўзбекистоннинг бошқа туман ва шаҳарларида ҳам бор, дейилади хабарда.
Изоҳ (0)