Фарғона вилояти ҳокими Шуҳрат Ғаниев 23 январь куни Ақтўбедаги фожиа оқибатлари юзасидан йиғилиш ўтказган ҳамда интернетда тарқалиб кетган ва баъзи ўринлари ҳақоратли бўлган аудиоёзувдаги сўзлар унга тегишли. Буни вилоят ҳокимлигининг исмини ошкор этишни истамаган вакили «Газета.uz»га тасдиқлади.
Мавзуга доир: Фарғона вилояти ҳокими Ақтўбе бўйича йиғилишда тошлоқликларни «ҳароми» деб атаб, уларнинг Ҳажга боришини тақиқлади (аудио)
«Ақтўбеда юз берган воқеа катта фожиа. Шу боис, очиқ-ойдин кўриниб турибдики, вилоят ҳокими Тошлоқ туманидаги вазиятдан афсусда. У ўзининг бу чиқиши билан уларнинг ҳам виждони уйғониши, бундай воқеалар ортиқ такрорланмаслиги учун туман маъмуриятининг кўзини очиб қўйиш ниятида бўлган. Ҳокимни яқиндан билганлар у тошлоқликларни қанчалик яхши кўришидан хабардор. У фақат 2005 йилги митингга чиққанларни койиди, у конкрет одамларни назарда тутган», — деди «Газета.uz» суҳбатдоши.
Ҳокимлик вакилининг сўзларига кўра, ҳоким Ҳажни тақиқлаш ҳақида гапирганида зиёратга отланаётган одамларни ўз пулларини эҳтиёжмандларга хайрия қилишга чақирмоқчи бўлган.
Ҳокимлик вакилининг қўшимча қилишича, вилоят ҳокими Шуҳрат Ғаниевнинг 23 январдаги чиқиши келажакда Ақтўбедаги каби фожиали ҳодисаларнинг олдини олишга уриниш сифатида кўрилмоғи керак.
Изоҳ (0)