Лотин графикасига асосланган янги қозоқ алифбоси Қозоғистон учун ҳам, Ўзбекистон учун ҳам муҳим. Бу ҳақда Ўзбекистон Фанлар академияси вице-президенти Баҳром Абдуҳалимов Қозоғистоннинг Ўзбекистондаги Фавқулодда ва Мухтор Элчиси Ерик Утембаев билан учрашув чоғида айтиб ўтди, деб ёзади «Казинформ».
«Лотин графикасига асосланган алифбо Марказий Осиёда доим ишлатилиб келинган ва асосий ҳисобланган. Чорак аср давомида лотин ёзувидан фойдаланиш орқали, Ўзбекистонда маълум бир тажриба тўпланган. Шу билан бирга ҳаммамиз тушунамизки, бу жараён осон эмас, уни жорий қилиш анча вақт олади. Турли илмий ёндашувлар юзага келиши, бу борада зиддиятлар пайдо бўлиши ҳам истисно эмас. Аммо нима бўлганда ҳам, лотин графикасига асосланган бу алифбо Қозоғистон ва Ўзбекистон учун жуда муҳим, чунки тарихимизни усиз тасаввур қилиб бўлмайди. Чунки кўплаб умумий китоблар ва архив ҳужжатлар ўз даврида айнан лотин ёзуви асосида яратилган», — деди Баҳром Абдуҳалимов.
Олимнинг сўзларига кўра, Ўзбекистонда янги ўзбек алифбосидан муваффақиятли равишда фойдаланувчи бутун бир авлод ўсиб-улғайган, ва Ўзбекистон Фанлар академияси қозоғистонлик шериклари билан лотин ёзувига ўтиш бўйича ишлар тажрибасини бўлишишга тайёр.
Изоҳ (0)