Ўзбекистон Республикаси ФВВ Фавқулодда вазиятларда бошқарув марказининг хабарига кўра, яқин кунларда Қозоғистоннинг аксарият ҳудудида ёғингарчиликсиз об-ҳаво сақланиб туради.
Қозоғистоннинг шимолий, шарқий ва марказий вилоятларида кучли совуқ бўлиши кутилмоқда. Шу муносабат билан 2018 йил 21 январь куни www.гисметео.кз сайтининг малумотига асосан бўрон огоҳлантируви эълон қилинган.
Қозоғистоннинг шимолий, шарқий ва марказий вилоятларига боришни режалаштираётган Ўзбекистон фуқароларидан вақтинчалик йўловчи автобуси ва шахсий автотранспорт воситаларидан фойдаланмасликларини илтимос қиламиз.
Эслатиб ўтамиз, 18 январь куни Қозоғистоннинг Ақтўбе вилоятида Россияга кетаётган ўзбекистонликлар бўлган автобус ёниб кетди. Ҳодиса оқибатида 52 ўзбекистонлик ҳалок бўлди. Автобусда ёнғин чиқишига кавшар лампа сабаб бўлган.
«Автобуснинг двигатели ўчиб қолганлиги ва машина ичи совуқ бўлганлиги сабаб ушбу кавшар лампадан иситгич сифатида фойдаланилган. У икки соатга яқин ишлаган ва табиийки газ-бензинли аралашма бутун салонни эгаллаган. Тасодифан бензин тўкиб юборилганида эса ёнғин юзага келган», — деди Қозоғистон ички ишлар вазири ўринбосари Ерлан Тургумбаев.
Изоҳ (0)