Ўз ватанидаги муаммолар сабаб Венесуэладан қўшни мамлакат — Колумбияга қочиб кетаётганлар сони 550 минг кишидан ортди. Бу ҳақда Колумбия ҳукуматининг маълумотларига таяниб, «РИА Новости» хабар берди.
Ушбу маълумотлар 2017 йилнинг 31 декабрига кўра келтирилган, бу эса ундан олдинги йилга нисбатан 62 фоизга кўп демакдир.
«Венесуэладаги вазият нафақат минглаб колумбияликларни ўз ватанига қайтишга мажбур қилди, балки венесуэлаликлар ҳам бизнинг мамлакатимиз орқали бошқа давлатларда яшаш учун йўл олиш ёки бирламчи эҳтиёжда зарур бўладиган маҳсулотларни сотиб олиш имкониятини кўрмоқда», — дейди Колумбия миграция хизмати директори Кристиан Крюгер.
Венесуэлада инфляциянинг ортиши ва давлат даромадининг кескин камайиши, маҳсулотларнинг танқислиги, нефть нархининг пасайиши, шунингдек, президент Николас Мадурога нисбатан норозилик намойишларининг авж олиши сабаб вазият жуда хавфли тус олган.
Изоҳ (0)