Қозоғистоннинг Ақтўбе вилояти Ирғиз туманида 18 январь, пайшанба куни юз берган ва 52 ўзбекистонликнинг ўлими билан тугаган автобус ёнғинининг аниқ сабаблари ҳозирча номаълум. Бу ҳақда, Қозоғистон Фавқулодда вазиятлар қўмитаси расмий вакили Руслан Иманқуловга асосланиб, «Интерфакс» хабар бермоқда.
Иманқулов журналистларнинг «автобус ёнғинига портлаш ёки қасддан ўт қўйиш сабаб бўлганми?», қабилидаги саволига жавоб бераркан, жумладан, шундай деди: «Биз ҳозирча ҳеч қандай версияларни кўриб чиқмаяпмиз. Бу борада ҳозирча ҳеч қандай изоҳ йўқ».
«РИА Новости» агентлиги эса Иманқуловнинг сўзларидан қуйидагича иқтибос келтирган: «Автобус ёнғини сабаблари ҳақида гапиришга ҳали эрта. Тегишли экспертизалар ўтказилмагунига қадар, ҳеч бир версия на рад этилади ва на тасдиқланади».
Аввалроқ «Nur.kz» нашри Қозоғистон ФВҚ вакилига асосланиб, дастлабки тахминлар бўйича ёнғинга автобус симларидаги қисқа туташув сабаб бўлгани ҳақида хабар берган эди.
«Бундан ташқари, маълум бўлишича, автобус рухсат этилганидан ортиқча йўловчи ва юк билан кетаётган бўлган», — дейилади «Nur.kz» хабарида.
Эслатиб ўтамиз, яқин вақт ичида ҳодиса жойига Ўзбекистондан махсус борт парвоз қилиши кутилмоқда.
Изоҳ (0)