Кўп йиллар давомида гапирилмай келган муаммолар 2018 йилда очиқ ҳал қилинади, аммо бу жараён «муайян мувозанатсизлик»ка олиб келиши мумкин. Бу ҳақда Олий Мажлис Сенати раиси биринчи ўринбосари Содиқ Сафоев журналистларга маълум қилди, деб ёзади «Газета.uz».
Бу йил энергия манбалари нархини бозор нархларига мувофиқлаштириш режалаштирилмоқда, бу эса бошқа соҳаларда нархларнинг кўтарилишига олиб келади. «Бу ерда йирик инфляция ҳамда иқтисодиётнинг маълум бир сегментларига ва аҳолига салбий таъсири олдини олиш бўйича оқилона сиёсат талаб этилади», — деди сенатор.
Иқтисодиётдаги вазият кўп жиҳатдан бундан олдинги босқичга хос бўлган салбий ҳолатларни тўғрилашга боғлиқ бўлади, дея таъкидлади Сафоев.
«Алоҳида гуруҳлар, шахслар ёки компанияларнинг баъзи ресурслардан эксклюзив тарзда фойдаланиш ҳуқуқига нуқта қўйилади. Бу адолат, пировардида нархларга ҳам таъсир қилиши керак. Чунки монополия, шу жумладан, маҳсулотларнинг муайян турини етказиб беришдаги монополия ҳам доим нархларнинг сунъий оширилишига олиб келган», — деди у.
Монополиядан чиқариш АКТ хизматлари соҳасига ҳам тегишли бўлади. «Бунда гап интернетга уланиш тезлигини бир неча маротаба ошириш ҳақида бормоқда, бу ‘Электрон ҳукумат’ тизими ва давлат хизматларини кўрсатиш учун жуда муҳим. Бу соҳада ҳақиқий монополиядан чиқариш бўйича режалар бор», — дея қайд этди сенатор.
Изоҳ (0)