2017 йил якунлари бўйича Ўзбекистон олтин-валюта захираси йил давомида 1,4 миллиард долларга ошиб, 26,6 миллиард долларни ташкил этди. Бу ҳақда Марказий банк матбуот хизмати маълум қилди, дея хабар беради «Газета.uz».
Илк бор олтин-валюта захираси ҳақидаги маълумот 2017 йил ноябрида расман эълон қилинган, унинг ҳажми куз бошидан 750 миллион долларга кўпайиб, 26 миллиард долларни ташкил этгани билдирилганди.
Банкларга нақд пул тушуми ҳам ошди. Жумладан, 2017 йилнинг биринчи ярмида банк кассалари орқали нақд пул айланмаси бир ойда ўртача 4,8 триллион сўмни ташкил этиб, 900 миллиард сўм миқдордаги нақд пул эмиссия қилинган бўлса, йилнинг иккинчи ярмида бу кўрсаткич қарийб 2 баробарга ортиб, 9,4 триллион сўмга етди. Бунда нақд пулдаги даромад ва харажатлар ўртасидаги мувозанат таъминланди.
Банк активлари ва кредит қўйилмалари ҳажми 2 баробарга ошиб, мос равишда 166,6 триллион сўм ва 110,6 триллион сўмни ташкил этди. 2017 йил якунлари бўйича тижорий банкларда жами депозитлар ҳажми 58,7 триллион сўмга етиб, 2016 йил билан таққосланганда 61 фоизга кўпайди.
Изоҳ (0)