Шифокор бўлиш учун салкам 10 йил умрини сарфлаган одам 424 минг сўм ойликка ишлайдими?
«Дарё»га Бухородан хат келди. Хатга сурат ҳам илова қилинган. 2017 йил якунларига кўра Ўзбекистонда ўртача иш ҳақи 1,5 миллион сўмга етгани ҳақида хабарлар берилаётган бир вақтда эътиборга молик хат.
Уни жузъий таҳрирлар билан эътиборингизга ҳавола қиламиз.
Бу — Бухоро шаҳар Эндокринология шифохонасидаги баннер. Унинг юқорисига «Биз порахўрликка қаршимиз!», деб ёзилган, қуйи қисмида эса шифохона ишчиларининг маошлари кўрсатилган.
Фото: «Дарё» мобил мухбири
Шулардан бирига эътибор қаратиш кифоя (чунки қолганларининг ҳам аҳволи шу): тоифасиз врач ойлиги — 424 минг сўм (бу қанча ставка учунлиги кўрсатилмаган).
Фото: «Дарё» мобил мухбири
Энди шу лавозимни эгаллаш учун босиб ўтиладиган йўлни кўриб чиқайлик:
1. Абитуриент камида бир йил давомида олийгоҳга ўқишга кириш учун тайёргарлик кўради. Тахминий харажат — 1000 АҚШ доллари ё 8 миллион сўм атрофида.
2. Ўқишга ўз кучи билан, тўлов-контракт асосида кирди, деб олайлик. Янги тартиб бўйича камида олти йил ўқиши керак. Ҳозирда тиббий олийгоҳларда бир йиллик контракт пули — 8,5 миллион сўм.
3. Албатта клиник ординаторликка ўқиши ё магистр бўлиши керак, акс ҳолда 6 йиллик тўлиқсиз олий маълумоти билан уни фақат қишлоқ врачлик пунктига ишга олишади. Шаҳарда ишлаш учун тор мутахассисликка ўқиш шарт. 6 йилга қўшимча яна 2 ё 3 йиллик ўқиш, бу ҳам контракт, дейлик.
Бу кўзга очиқ кўриниб турган йирик суммалар. Лавозимгача бўлган салкам бир декада умр (1 йил абитуриентлик + 6 йил бакалавриат + 2 йил ординатура) давомида бўлажак шифокор еб-ичиши, кийиниши, қаердадир яшаши, кийиниши ҳам керак. Сўнг ишга киради. Нима, у 424 минг сўм ойликка ишлайдими?
У шифокорликкача бўлган харажатларини чиқариши учун энди нима қилсин? Мабодо у ўғлини ҳам шифокор этиб тарбияламоқчи бўлса, контракт пулини кимдан олсин? Бу 424 минг сўмлик маош шифокорнинг ишга келиб-кетиши ва тушлигига етса-да катта гап — ортиқча орзу-ҳавасни унутса ҳам бўлаверади.
Бу гапларни ёзишдан мақсад — кимнидир ёмонлаш, танқид қилиш, бировнинг жазоланишига эришиш эмас. Аксинча, Президент Шавкат Мирзиёев «нореал рақамлар»ни йўқотиш ташаббуси билан чиққани учун ёзяпман. Бу — тиббиётимизнинг барча бўғинларида кузатиш мумкин бўлган ҳолат. Бу масаланинг ечими — шифокорлар маошини ошириш; қачонки маош етарли бўлса, шифокорда ҳам таъмагирликка, порахўрликка зарурат қолмайди.
Изоҳ (0)