Тошкентда Xiaomi Redmi Note 5А Prime смартфони 1,2 млн сўмдан сотила бошлади

Ўзбекистонда Xiaomi Redmi Note 5А Prime смартфони сотила бошлади, деб ёзади «Mobinfo.uz». Бу Хитой компанияси ассортиментидаги арзон смартфонлардан биридир. «Prime» деган қўшимчали Redmi Note 5А фақат кенгайтирилган хотираси билан фарқланади (классик версиядаги 2/16 Гб ўрнига, 3/32 Гб).

Янги қурилманинг асосий ўзига хос жиҳатларидан бири бир йўла иккита SIM-карта ва битта microSD хотира картасини ўрнатиш имконини берувчи тўла-тўкис слот бўлди.

Телефон 5,5 дюймли ва 1280×720 пикселли, Corning Gorilla Glass қопламали IPS-экран, 8 ядроли Qualcomm Snapdragon 435, 3 Гб тезкор ва 32 Гб доимий хотира, 13 мегапикселли асосий ва 16 мегапикселли олд камера, 3080 мА/соат сиғимли аккумулятор билан жиҳозланди. Смартфон Android 7.1 Nougat’га асосланган MIUI операцион тизимида ишлайди.

Тошкентнинг «Малика» савдо марказида Xiaomi Redmi Note 5А Prime’ни 1,2 миллион сўмга харид қилиш мумкин.

Ушбу қурилмани кўрсатилган нархда сотиб олишга «Дарё» нашри кафолат бермайди. Қурилма ва унинг нархи ҳақидаги ахборот фақат танишиш учун тақдим этилган.