«Ўзбекистон» телеканалидаги «Учбурчак» ток-шоусининг 6 январь сонида келинига севги изҳор қилгани айтилаётган қайнота билан боғлиқ шов-шувли мавзуга қисқача тўхталиб ўтилди. Бу мавзу ток-шоунинг 2017 йил 23 декабрь сонида очилган эди. Ўшанда исми Мухлиса бўлган келин кўрсатувда чиқиш қилиб, унга қайнотаси севги изҳор қилгани, оқибатда оиласи ажрашиб кетиш ёқасида турганини эълон қилган.
Мавзуга доир: «Қайнотам менга севги изҳор қилди». Ўз номини оқлаш учун телевидениега чиққан келин ҳикояси (видео)
Қайнонанинг сўзлари
Уни кенжа ўғлимга яхши ниятлар билан келин қилиб туширган эдим. Бизни боқади, бизга қарайди, деб роса яхши муомала қилдим. Лекин у менга меҳрибончилик қилмади. Бошидан ҳам унча меҳри йўқ эди. Бошқа икки келинимни, Худога шукр, йўлимга солганман, уни ҳам шундай йўлга соламан деб, ниҳоятда яхши гапириб, эркалатиб қўйдим-да. Чолим ҳам шунақа эркалатаверди, эркалатаверди. Бизга қарайди, деб ўйладик-да.
«Севаман» деган сўзни биз нотўғри тушунмасдик. «Севаман» билан «яхши кўраман»ни нима фарқи бор? Хўжайиним «яхши кўраман», «севаман» деган бўлиши мумкин, келин нотўғри тушунгандир. У ҳамма фикрни тескари тушунаверган. Мен унга: «Қизим, нотўғри тушунмагин, унинг ҳаракатини тўғри тушунгин», деб тушунтирдим. Тушунди. Лекин уйига борганда ҳамма гапни ташийверди, гап ташиш билан овора бўлди. Онасига шу гапларни айтган бўлса, онаси қизига нотўғри тушунтириб, кейин уни бизга қарши қўйди.
Биз хўжайиним билан 41 йилдан бери бирга яшаймиз. Чолимнинг тескари, бир ножўя йўлга юрганини ҳеч қачон кўрмаганман. Етти йил бефарзанд яшадик. Бир-биримизни яхши кўриб, ҳурмат қилардик. Хўжайиним келса, тикка турардим — ўтиришга ҳеч ҳаққим йўқ эди, чунки ҳурматим кучли эди. Хўжайиним ҳам шуни билардилар. Менга хиёнат қилишлари ҳеч қачон мумкин эмасди. Ҳеч қачон ишонмайман. Шайтон бўлса ҳам ишонмайман ҳеч қачон. Бўлмаган бунақа нарса.
Қайнотанинг сўзлари
Бизнинг оилада «севаман» деган сўз одатий ҳоллиги ҳақидаги гаплар — бекор. Мен «севаман» деб юртимни, ватанимни айтаман. Келинга «севаман» деб айтмаганман.
Унга: «Қизим, тўққиз неварам бор, ўнинчиси сенсан, тўққизинчи неварам бўлган қизингни қандай кўрсам, сени ҳам шундай кўраман, невараларимни қандай яхши кўрсам, сени ҳам шундай яхши кўраман, бизларга яхши қарагин, қариб қоляпмиз», деганман. Эрта-индин биз қариб қоламиз, бизга кимдир қараши керак, деган мақсадда айтганман.
Белимда кучим, чўнтакда пулим бўлган вақтда ҳам бундай разолат кўчасига кирмаганман. Ёнимдаги елкадошларимдан кимдир чапга, кимдир ўнгга кетганида ҳам мен тўғри кетганман. Аёлимнинг ўзига айтмаганман, лекин сизларнинг олдингизда айтаман — аёлимга таъзим қиламан.
Телевидениега келишимдан мақсад — юзим кўринмаса ҳам, таниш-билишларим мени таниб ўтирибди — Ўзбекистон халқидан, 32 миллион аҳолидан кечирим сўрамоқчиман: уларнинг қимматли вақтини олаётганим учун — дақиқа ғанимат. Бизнинг фурсатимиз кам қолди, 65 ёшга чиқдим. Бугун борман, эртага борманми-йўқми?! Мен ажрашсин ё ярашсин, демайман, энди вақт олий ҳакам. Юқорида кўриб турибди ҳаммасини.
Изоҳ (0)