“Afg‘on shamoli” va boshqa ko‘plab roman hamda qissalar muallifi Isoqjon Nishonovning O‘zbekistonning Birinchi Prezidenti Islom Karimov xotirasiga bag‘ishlangan “Jasorat” nomli romani chop etildi, deb xabar berdi “Namnews.uz”.
Mazkur roman “Namangan” nashriyoti tomonidan tayyorlanib, Toshkentdagi “Yosh kuch press matbuoti” bosmaxonasida chop etildi va tez kunlarda kitobxonlar qo‘liga yetib boradi.
Xususan, romanga 1991-yilda Namanganda yuzaga kelgan qaltis vaziyat, uni bartaraf etish uchun yetib borgan Islom Karimovning tashabbusi asos qilib olingan. Ma’lumki, o‘sha yillarda Namanganda turli diniy oqimlar, “Adolat”, “Islom lashkarlari” kabi norasmiy tuzilmalar paydo bo‘lib, ular xalqparvarlik niqobi ostida sho‘ro istibdodidan endigina qutilgan va hali kelajagini aniq-tiniq tasavvur qilishga ham ulgurmagan xalqni chalg‘itib, konstitutsion tuzumga qarshi faoliyat boshlagan edi.
“Aslida bunday ilohiy jasorat va zakovatni qalam bilan, so‘z bilan ta’riflab bo‘lmaydi. Agar o‘sha paytda Birinchi Prezidentimiz bundan boshqacha yo‘l tutganida, balki tarix charxpalagi ters aylanib ketgan bo‘lishi, bugungiday farovon hayot xalqimiz uchun uzoq yillar orzu bo‘lib qolishi mumkin edi, xudo asrasin. Mazkur asar vositasida o‘sha fojiali kunlar haqida, jasorat va matonatning oliy namunasi haqida kitobxonlar qalbida ta’sirchan bir tasavvur, bugungi kunlarga shukronalik tuyg‘ularini uyg‘ota olgan bo‘lsam murodim hosil bo‘ladi”, — deydi Isoqjon Nishonov.
228 sahifadan iborat romanda o‘sha alg‘ov-dalg‘ov yillar voqealari ishonchli manba, dalil va ma’lumotlar asosida badiiy ifoda etilgan. Asar qahramonlarining barchasi o‘z prototipga ega ekanligi ta’kidlanadi xabarda.
Izoh (0)