Туркиянинг «Фенербахче» клуби ўзбекистонлик Виталий Денисов учун «Локомотив»га 3 миллион таклиф қилди

Ўзбекистон миллий терма жамоаси ҳамда Москванинг «Локомотив» футбол клуби ҳимоячиси Виталий Денисов фаолиятини Туркия чемпионатида давом эттириши мумкин, деб ёзди «Championat.asia» сайти.

Мамлакатнинг энг номдор жамоаларидан бири «Фенербахче» ўзининг чап қанот ҳимояси ва ярим ҳимоясини кучайтириш ниятида. Бу йўлда улар Виталий Денисовни ўз сафига қўшиб олишни мақсад қилган.

«Локомотив» футболчиси жорий мавсум Россия Премьер-Лигасининг ортда қолган 20 та туридан кейин фақатгина 7 та беллашувда майдонга тушди. Унинг нархи Transfermarkt.de нашри маълумотига кўра, 5 миллион еврони ташкил қилади. Туркия томони айни пайтда Денисов учун 3 миллион тўлашга тайёр.

30 ёшли ҳимоячи бу таклифга қандай муносабат билдиргани, «Локомотив» уни ўрганиб чиқмоқдами ёки йўқ — аниқ маълумот берилмаган. «Фенербахче» Туркия Супер Лигасининг 16-туридан кейин турнир жадвалида «Истанбул Башакшеҳир» клубидан сўнг иккинчи бўлиб турибди.