Ўзбекистон Республикаси Президенти Шавкат Мирзиёев жорий йил январь ойида Қорақалпоғистон Республикасига ташрифи давомида ишлаб чиқаришни маҳаллийлаштириш даражасини чуқурлаштириш, янги иш ўринларини яратиш мақсадида йирик ва кичик корхоналар ташкил этиш ташаббусини илгари сурган эди, деб хабар беради ЎзА.
Президент ташаббусига жавобан «Artel» компанияси томонидан Нукус шаҳридаги собиқ «Нукус Реммаш» МЧЖга қарашли бино ва иншоотлар қайта таъмирланиб, замонавий қиёфага келтирилди. Бу ерда Жанубий Кореянинг Samsung Electronics компанияси билан ҳамкорликда олти ойда «Samsung Нукус» заводи фаолиятини йўлга қўйди.
«Samsung Нукус» заводида ишлаб чиқарилаётган телевизор ва чангютгичлар ҳам қўшни мамлакатларга экспорт қилинмоқда.Корхона мутасаддилари берган маълумотга кўра, бугун бу ерда Samsung бренди остида 4 турдаги телевизор, 13 турдаги чангютгичлар ишлаб чиқарилмоқда.
Истиқболдаги режаларга кўра, 2018 йил янги турдаги 60 минг дона телевизор ва 100 минг дона чангютгич тайёрлаш йўлга қўйилади, маҳаллийлаштириш даражаси 60 фоизга тенглашади. Бундан ташқари, йилига 100 минг дона микротўлқинли печь ишлаб чиқариш бўйича ҳам ишлар бошлаб юборилган.
Изоҳ (0)