Калифорния соғлиқни сақлаш департаменти ухлаётган одамнинг ёнида қолдирилган смартфонлар саломатлик учун қандай хавфларни келтириб чиқариши ҳақида маъруза чоп этди, деб ёзади Hi-Tech Mail.Ru. Гаджетлардан чиқадиган электромагнит нурланиш саратон ва бепуштлик хавфини ошириши ҳақида тобора кўпроқ далиллар пайдо бўлмоқда, дейилади мақолада.
Таъкидланишича, смартфонлар ва турли касалликлар ўртасидаги алоқа яққол аниқланмаган бўлса-да, мавжуд маълумотлар фойдаланувчиларни, айниқса болаларни гаджетларнинг потенциал хавфи ҳақида огоҳлантириш учун етарлидир. Мутахассислар тавсия қилишича, қўлланилмаётган смартфон одамдан бир ёки бир неча метр узоқликда туриши керак.
Шунингдек, мақолада қайд этилишича, гаджетлардан фойдаланиш ўсмирлар уйқусига, уларнинг руҳий саломатлигига зарар етказиши ва диққат концентрацияси бузилишига олиб келиши мумкин. Аммо қурилмалар чиқарадиган радиочастотали нурланиш ҳам хавф туғдириши мумкин. Нурланиш қурилмаларни чўнтакларида олиб юрадиган эркакларнинг спермалари сифатига таъсир қилиши мумкин, дейилади маърузада. Мутахассислар уйқу чоғида смартфонларни ёстиқ тагида ёки каравот ёнидаги тумбочка устида қолдирмасликни маслаҳат беради.
Изоҳ (0)