12 декабрь куни жиноят ишлари бўйича Самарқанд шаҳар суди очиқ мажлисида йўл-транспорт ҳодисалари оқибатида вафот этган бир неча кишининг ўлимида айбланаётган ҳайдовчилар иши кўриб чиқилди, деб хабар беради «Газета.uz».
Самарқанд шаҳрида яшовчи 72 ёшли фуқаро 1 октябрь куни Регистон кўчасидан Даҳбет кўчасига қайрилиб, ҳеч қандай сабабсиз йўлнинг қарама-қарши томонида ҳаракатланиб, белгиланган тезликни оширган. Оқибатда ҳайдовчи йўлни кесиб ўтаётган аёлни уриб юборган. Пиёда оғир жароҳатлар олгани туфайли ҳаётдан кўз юмган.
Айбланувчи судда ўз айбига тўлиқ иқрор бўлди. Суд уни Ўзбекистон Республикаси Жиноят кодексининг 266-моддаси (Транспорт воситалари ҳаракати ёки улардан фойдаланиш хавфсизлиги қоидаларини бузиш) 2-қисми ва 45-моддасида (Муайян ҳуқуқдан маҳрум этиш) кўзда тутилган жиноятларни содир этганликда айбдор деб топди.
Ҳайдовчи икки йил муддатга транспорт воситаларини бошқариш ҳуқуқидан ҳамда ЖКнинг 57-моддасига (Енгилроқ жазо тайинлаш) мувофиқ шартли равишда уч йилга озодликдан маҳрум этилди.
«Боғибаланд» маҳалласига қайрилаётганида катта тезлик билан ҳаракатланиб, пиёданинг ўлимига сабаб бўлган 1995 йилда туғилган ҳайдовчига нисбатан ҳам ЖКнинг юқорида кўрсатилган моддалари билан айблов эълон қилинди. Суд уни бир йилга транспорт воситаларини бошқариш ҳуқуқидан ва икки йилга шартли равишда озодликдан маҳрум этди. Шунингдек, унга икки йил давомида ойлик даромадининг 20 фоизини давлат ҳисобига ўтказиб туриш мажбурияти юкланди.
Изоҳ (0)