Вашингтон Кобулдан Россия томонидан беғараз тақдим этилган 50 минг дона «Калашников» автоматларини Америка қуролларига алмаштиришни талаб қилмоқда. Бу ҳақда Россия ташқи ишлар вазири Сергей Лавров маълум қилди, дея хабар бермоқда «ТАСС».
«Америкаликлар афғон хавфсизлик кучларига совға сифатида ўқ-дорилари билан бирга тақдим этилган 50 минг дона ‘Калашников’ автоматларини муомаладан чиқариб, уларнинг ўрнига Афғонистон томонидан АҚШ милтиқ ва автоматлари сотиб олинишини талаб қила бошлади», — деди Россия ташқи ишлар вазири.
«Бу 50 мингта автоматни энди қаерга йўқотиш керак, деган саволдан ташқари бошқа масала ҳам ўртага чиқмоқда — афғонлар кўниккан қурол-яроғдан уларни маҳрум қилиб, ҳали ўрганиши керак бўлган қуролни уларга тиқиштириш истаги нима билан изоҳланади?», — деди Лавров.
Вазирнинг ёдга солишича, аввалроқ АҚШ томони Афғонистонни Россия вертолётларидан воз кечишга чақириб, уларни Америка вертолётлари билан алмаштиришни талаб қилган эди.
Лавровнинг қўшимча қилишича, Россия наркожиноятчилик ва террорчиликка таҳдидларига қарши кураш йўлида Афғонистон армияси ва хавфсизлик кучларини қурол-яроғ билан таъминлашда фаол ёрдам кўрсатмоқда. «АҚШ бу таҳдидларни йўққа чиқаришни уддалай олмайди», — деди Лавров.
Изоҳ (0)